Монгол Улсын Их Хурлын дарга Ням-Осорын Учрал Дорнод аймагт ажиллаж байна. Тэрээр өнөөдөр “Хүүхэд эрдэнэ” төслийн үйл ажиллагаатай танилцсаны дараа аймгийн төрийн байгууллагын удирдлагуудтай уулзалт хийлээ. Уулзалтын эхэнд аймгийн Засаг дарга Ш.Ёл Дорнод аймгийн нийгэм, эдийн засгийн нөхцөл байдал, хэрэгжиж буй томоохон хөгжлийн төслүүд, орон нутгаас санаачлан амжилттай хэрэгжүүлж буй сайн туршлагуудын талаар товч мэдээлэл танилцуулсан юм. Тэрээр хөдөө аж ахуйн салбарт “Халх гол” үндэсний бүтээн байгуулалтын бүс болгон баталсан 500 мянган га талбайн асуудлыг бүхэлд нь цуцлуулах, газрын тосны нөөц ашигласны төлбөрөөс тухайн сум, орон нутагт ногдох хувь хэмжээг нэмэгдүүлэх, тус аймагт гэрлэл ёслолын танхим бүхий хүүхэд, гэр бүлийн хөгжлийн ордоны барилга барих, МУИС-ийн Зүүн бүсийн сургуулийн гадна инженерийн шугам сүлжээний засвар, шинэчлэл хийх, Дорнод Политехник коллежийн өргөтгөлийн барилга барих (зураг төсвийг орон нутаг шийдвэрлэсэн), сэргээгдэх эрчим хүчний төслүүдэд бодлогын дэмжлэг үзүүлэх, агро парк, өвлийн болон ухаалаг хүлэмжийн аж ахуйг хөгжүүлэхэд дэмжлэг хүсч байгаагаа УИХ-ын дарга Н.Учралд илэрхийллээ. УИХ-ын дарга Н.Учрал уулзалтын үеэр Монгол Улсын Үндсэн хуульд заасан иргэн, хүний эрх, эрх чөлөөг хангах зорилготой “Чөлөөлье” санаачилгын талаар мэдээлэл өгч, төрөөс иргэн, хуулийн этгээдэд үйлчилгээ үзүүлэхдээ тавьж буй шаардлагууд буурахгүй, харин ч хууль давсан дүрэм, журам нэмэгдсээр байгааг дурдав. Энэ хүрээнд хууль эрх зүйн орчны давхардал, хийдлийг арилгах зорилгоор УИХ-аас 12 ажлын хэсэг байгуулан салбар бүрт ажиллаж байгааг танилцууллаа. Тэрээр Дорнод аймгаас санаачлан хэрэгжүүлж буй хүүхдийн хөгжил, хамгааллын чиглэлийн төсөл, хөтөлбөрүүдийг томоохон дэвшил, зөв алхам хэмээн үнэлж, цаашид улсын хэмжээнд нэвтрүүлэхэд дэмжлэг үзүүлж ажиллахаа илэрхийллээ. Мөн хаврын чуулганаар хэлэлцүүлэхээр бэлтгэж буй хуулийн төслүүдийн талаар мэдээлэл өгч, Ашигт малтмалын нөөц ашигласны төлбөрийн тухай хуулийн төслийг хэлэлцүүлэхээр төлөвлөснийг онцолсон юм.