Category Archives: Цаг үе, Үйл явдал

22491588_1695322470479571_2559261287085028551_n

“Соёл урлагийн салбарын хөгжлийг дэмжих” хөтөлбөртэй боллоо

Аймгийн соёл урлагийн байгууллагуудыг чадавхжуулах, соёлын өвийг түгээн дэлгэрүүлэх, өвлөн уламжлуулах зорилго бүхий “АЙМГИЙН СОЁЛ УРЛАГИЙН САЛБАРЫН ХӨГЖЛИЙГ ДЭМЖИХ ХӨТӨЛБӨР” аймгийн ИТХ-ын ээлжит 5-р хуралдаанаар батлагдлаа. Энэхүү хөтөлбөрийн гол зорилго нь аймгийн соёл урлагийн мэргэжлийн байгууллагуудын хөгжлийг дэмжих, урлаг, соёлын бүтээгдэхүүн, үйлчилгээний нэр төрлийг нэмэгдүүлэхэд оршиж байгаа юм.

jamyan_huurch

Булган сумын Соёлын төвийг Г.Жамъянгийн нэрэмжит болгов

Аймгийн иргэдийн Төлөөлөгчдийн Хурлын ээлжит 5 дугаар хуралдаан өнөөдөр хуралдаж байна.

Хуралдаанаар Булган сумын Соёлын төвийг Ардын жүжигчин, Төрийн шагналт, Зууны манлай морин хуурч Г.Жамъянгийн нэрэмжит болгох тухай асуудлыг хэлэлцэж, баталлаа.

Монголын морин хуурын орчин цагийн сургалтыг үндэслэгч, хөгжмийн урлагийн нэрт төлөөлөгч, сурган хүмүүжүүлэгч, профессор, төрийн их хуурч Гомбодоржийн Жамъян нь 1919 онд Дорнод аймгийн Булган сумын Туг уул хэмээх газар мэндэлсэн Булган сумын уугуул, тус сумаас төрсөн суут хүмүүн билээ.

Их хуурчийн гэр бүлийнхэн тус сумын Соёлын төвийг нэрэмжит болгох тухай хүсэлт гаргасны дагуу сумын иргэдийн Төлөөлөгчдийн Хурлаас аймгийн иргэдийн Төлөөлөгчдийн хурал, аймгийн Засаг даргад хүсэлт ирүүлжээ.

Г.Жамъян хуурч 20 орчим дуу, 2 хөгжимт драмын жүжиг, 14 концертын бүжиг, 1 бүжгийн жүжгийн хөгжим, үндэсний болон европын төрөл бүрийн хөгжмийн зэмсэгт тохируулан бичсэн 50 гаруй зохиол, морин хуур хөгжмийн 2 сурах бичиг, 1 дуурь, 2 киноны хөгжим бичиж, дэлхийн 20 гаруй оронд өөрийн үндэсний урлагаа сурталчлан таниулсан шавхагдашгүй суу билиг, авьяаст хүмүүн юм.

Их хуурчийн охин Ж.Цэцгээ Монголын хамгийн нарийн сапрон хоолойтой дуучин бөгөөд түүний хүү нь “Камертон” хамтлагийн ахлагч, Төрийн соёрхолт дуучин  Д.Болд билээ.

22552809_1834838056827620_2733347238724188778_n

Иргэн та С вируст хепатитийн эмчилгээнд үнэ төлбөргүй хамрагдаарай

Монгол Улсын Засгийн газраас орон даяар хэрэгжүүлж буй “Элэг бүтэн Монгол” хөтөлбөрийн хүрээнд энэ онд 40-65 насны бүх иргэдийг өрх, сумын эрүүл мэндийн төвд элэгний В, С вирүс илрүүлэх шинжилгээнд хамруулан, С вирүсийн халдвар илэрсэн тохиолдолд вирусийн ачаалал тоолох шинжилгээнд үнэ төлбөргүй хамруулж, эмчилгээ шаардлагатай иргэдийг хөнгөлөлттэй үнээр эмчилгээнд хамруулж байгаа билээ.

Санхүүжилтийн улмаас түр хугацаагаар зогсоод байсан ачаалал тоолох шинжилгээг 10 дугаар сарын 10–наас эхлэн БОЭТ-д дахин үнэ төлбөргүй хийж эхлээд байна.
Иймд С вирусийн халдвар илэрсэн 40-65 насны иргэн та БОЭТ-ийн лабораторид өөрийн биеэр ирж ачаалал тоолох шинжилгээгээ үнэ төлбөргүй хийлгээрэй.
Мөн эмчилгээ хийлгэх шаардлагатай тохиолдолд эрх бүхий эмчээр эмээ бичүүлэн эмчилгээгээ хийлгэх бөгөөд дараах 4 төрлийн эм манай аймагт худалдаалагдаж байна.

Үүнд:  Хепсинат-210000 /Төгс Фармакон эмийн сан 24-р байр/,
Ледвир-340000 /Дорнод эм хангамж, Гаалийн газрын баруун талд/,
Ледипас-350000 /Ачит тан эмийн, 20-р байр/,
Верипас-340000 /Мянган сарнай эмийн сан, 22-р байр/
Эрүүл мэндийн даатгалын сангаас элэгний С вирусийн эмийн үнийг 210000 төгрөгөөр хөнгөлж байгаа учир эрүүл мэндийн даатгалтай иргэд Хепсинат эмийг ҮНЭГҮЙ, бусад эмийг 130000-140000 төгрөгөөр худалдан авах боломж бүрдэж байгаа юм
Иймд 40-65 насны иргэн та илрүүлэг шинжилгээндээ идэвхтэй хамрагдаж, вирус илэрсэн тохиолдолд эмчилгээгээ яаралтай хийлгэнэ үү.
Илрүүлэг шинжилгээ, эмчилгээнд хамрагдахын тулд та ЭРҮҮЛ МЭНДИЙН ДААТГАЛ ТӨЛСӨН байх ёстойг анхаарна уу.

Эх сурвалж: http://www.dornod.moh.gov.mn

IMG_0094

Аймгийн Засаг даргад зөвлөн туслах “Ахмадын зөвлөх баг”-тай уулзав

Монгол Улсын хууль тогтоомж, төрийн бодлого шийдвэр, Дорнод аймгийн 2016-2025 оны хөгжлийн хэтийн зорилт, хөтөлбөр, төслийг хэрэгжүүлэх ажилд зөвлөн туслах “Ахмадын зөвлөх баг”-ийг өнгөрсөн сард байгуулсан. Зөвлөх багт төр захиргаа, эдийн засаг санхүү, нийгэм, соёл, спорт, эрүүл мэнд, боловсрол, бүтээн байгуулалт, инженерийн салбаруудын ахмадуудаас олон жил салбартаа үлгэр дууриал болсон, хийж бүтээсэн зүйлээрээ бусдад үлгэр дууриал болж,  төрийн хүндэтгэл хүлээсэн хүмүүс багтаж байгаа юм.

         Энэ удаад “Зөвлөх баг”-ийнханд Аймгийн эдийн засаг нийгмийг 2017 онд хөгжүүлэх үндсэн чиглэлийн биелэлт, Аймгийн эдийн засаг нийгмийг 2018 онд хөгжүүлэх үндсэн чиглэлийн төсөл болон бусад хөтөлбөр төслүүдийн талаар танилцуула хийж зөвлөгөө авлаа.

          “Ахмадын зөвлөх баг” нь 9 хүний бүрэлдэхүүнтэй бөгөөд багийн Нарийн бичгийн даргаар төр захиргааны ахмад ажилтан Б.Өлзийбаян, гишүүдэд МУ-ын Гавьяат эдийн засагч, аймгийн ИТХ-ын төлөөлөгч Л.Түвдэнням, МУ-ын Эрүүлийг хамгаалахын гавьяат ажилтан, Нийгмийн эрүүл мэндийн мастер, тэргүүлэх зэргийн эмч, “Нью-Эндорфин” ХХК-ийн захирал С.Вандансүрэн, МУ-ын Соёлын Гавьяат зүтгэлтэн, МҮОНР-ийн орон нутаг дахь сурвалжлагч Л.Хэрээ, Төр захиргааны ахмад ажилтан С.Чойжилсүрэн, “ДБЭХС” ТӨХК-ийн ахмад ажилтан П.Цэрмаа, Улаанаатар төмөр замын Баянтүмэн тасгийн ахмад ажилтан Ш.Моонон, Инженер, зохион бүтээгчдийн нэгдсэн холбоо” ТББ-ын тэргүүн Д.Сүхбаатар, Дорнод аймгийн ахмад багш нарын холбоо”-ны тэргүүн Л.Нарандаваа нар тус тус ажиллаж байна

22522356_1772361426130248_1144957639_o

“Хэрлэн экспо-2017” үзэсгэлэн худалдаа болно

Аялал жуулчлалын салбарын хөгжлийг эрчимжүүлэх ажлын хүрээнд Монгол улс, ОХУ, БНХАУ-ын аялал жуулчлалын бизнес эрхлэгчдийн хамтын ажиллагааг өргөжүүлэх, аялал жуулчлалын бүтээгдэхүүний борлуулалтыг нэмэгдүүлэх зорилгоор 8 дахь жилдээ зохион байгуулагдаж буй Хөрш зэргэлдээ гурван улсын аялал жуулчлалын өдөр арга хэмжээний “Хэрлэн экспо-2017” үзэсгэлэн худалдаа 2017 оны 10 дугаар сарын 20-22-ны өдрүүдэд Хэрлэн номин Бизнес Төвийн үзэсгэлэнгийн талбайд болно.

Энэ үеэр үзэсгэлэн худалдаанаас гадна “Эдийн засагт тулгуурласан хот төлөвлөлт ба Зүүн бүсийн хөгжлийн гарц-2017” уулзалт, форум, Монголын Архитекторуудын үзэсгэлэнгийн нээлт тус тус болно.

Үзэсгэлэн худалдааг Аймгийн Засаг даргын тамгын газар, Худалдаа аж үйлдвэрлэлийн танхим, Монголын Архитекторуудын зөвлөл хамтран зохион байгуулж байна.

22497792_1852654868082148_778572166_n

Аймгийн эдийн засаг, нийгмийг 2018 онд хөгжүүлэх үндсэн чиглэлийн төслийг иргэдээр хэлэлцүүлж байна

Аймгийн иргэдийн Төлөөлөгчдийн Хурлын ээлжит хуралдаан энэ сарын 20-ны өдөр хуралдана. Хуралдаанаар Дорнод аймгийн эдийн засаг, нийгмийг 2018 онд хөгжүүлэх үндсэн чиглэлийн төслийг батлуулахтай холбогдуулан  төслийг Хэрлэн сумын 10 багийн иргэдээр хэлэлцүүлж байна.

Аймгийн Засаг даргын Тамгын газраас урьдчилан гаргасан хуваарийн дагуу хэлэлцүүлгийг 2, 3 дугаар баг, 1, 5, 8 дугаар баг, 6, 10 дугаар баг, 4, 7, 9 дүгээр баг гэсэн дөрвөн хэсэгт хуваан явуулах бөгөөд өнөөдөр 2, 3 дугаар багийн иргэдэд үндсэн чиглэлийн төслийг танилцуулж, тэдний саналыг сонслоо.

Аймгийн эдийн засаг, нийгмийг 2018 онд хөгжүүлэх үндсэн чиглэлийн төслийг Монгол Улсын Засгийн газрын 2016-2020 оны үйл ажиллагааны хөтөлбөр, Монгол Улсын эдийн засаг, нийгмийг 2018 онд хөгжүүлэх үндсэн чиглэл, 2019-2020 оны хандлага, Дорнод аймгийн 2016-2025 оны хөгжлийн хэтийн зорилт, 2030 он хүртэлх төсөөлөл, аймгийн Засаг даргын 2016-2020 оны үйл ажиллагааны хөтөлбөрийг үндэслэн боловсруулжээ.

Үндсэн чиглэлийг дөрвөн багц бодлогын хүрээнд хэрэгжүүлэх ба нийт 129 зорилт, 310 үйл ажиллагаа төлөвлөгдсөн.  Үүнд: Зохион байгуулалтын 57 арга хэмжээ, Хөрөнгө оруулалт, бүтээн байгуулалтын 45 төсөл, хөрөнгө оруулалтын бус шинжтэй 208 ажлаас үргэлжлэн хэрэгжиж буй 12 хөтөлбөр, бодлогын баримт бичиг, шинээр 17 хөтөлбөр, бодлогын баримт бичиг боловсруулахаар, сургалт 55, уулзалт зөвлөгөөн 30, олон улсын арга хэмжээ хоёрыг зохион байгуулахаар  тусгасан талаар аймгийн Засаг даргын Тамгын газрын Төрийн захиргааны удирдлагын хэлтсийн мэргэжилтэн Г.Наранбаатар танилцуулав.

22532359_1719768198095960_349741300_o

Үндсэн чиглэлийн төсөлтэй танилцсан 2, 3 дугаар багийн иргэд багийн алслагдсан иргэдэд цэвэр усны худаг гаргах, 00-ын асуудал, 1000 айлын орон сууцруу татах шугамаас 6 цэцэрлэгт дулаан татах, ашиглалтын хугацаа хэтэрсэн хуучин ягаан байрыг сэргээн засварлах боломжтой эсэх зэрэг тулгамдсан асуудлын талаар санал хэллээ.

Иргэдээс ирсэн саналыг эрэмбэлэх бөгөөд хэлэлцүүлэг маргааш хуваарийн дагуу үргэлжилнэ.

11.00 - 1, 5, 8 дугаар багт - 1 дүгээр багийн ажлын албаны байранд,

14:00 – 6, 10 дугаар багт – 10 дугаар багийн Ахмадын чөлөөт цагийн төвд,

15:00 – 4, 7, 9 дүгээр багт - Политехник коллежийн хурлын танхимд тус тус явагдана.

 

 

 

IMG_0656

Хугацаат цэргийн албан хаагчид өнөөдөр халагдан ирлээ

Монгол улсын үндсэн хуулинд “Эх орноо хамгаалах, хуулийн дагуу цэргийн алба хаах нь Монгол улсын иргэний үндсэн үүрэг мөн” хэмээн заасан байдаг. Энэхүү үүргээ нэр төртэй биелүүлэн  хугацаат цэргийн албаа хааж ирсэн залуус өнөөдөр аймгийн Батлан хамгаалах газрын дарга бөгөөд аймгийн Засаг даргад илтгэл өглөө.

Зэвсэгт хүчин, Хилийн цэргийн нөхөн хангалт, захиалга, тухайн жилд цэргийн жинхэнэ албанд татах иргэдийн тоо, татлага явуулах ээлж, хугацааг тогтоох тухай Монгол улсын Засгийн газрын тогтоолыг үндэслэн аймгийн Засаг даргын захирамжийн дагуу хугацаат цэргийн албаны цэрэг татлагыг зохион байгуулдаг.

Ийнхүү Сүхбаатарын болон Хөдөлмөрийн гавьяаны улаан тугийн одонт Дорнод аймгийн 14 сумаас цэргийн албанд татагдсан хугацаат цэргүүд Сүхбаатар аймгийн төвд байрлах Зэвсэгт хүчний 338 дугаар анги, Сүхбаатар аймгийн Эрдэнэцагаан суман дах Хилийн 0146 дугаар ангиудад тус тус албаа хаагаад нутагтаа өнөөдөр ирлээ.

Энэ үеэр аймгийн Хөдөлмөр, халамжийн үйлчилгээний газраас залууст зориулан хөдөлмөр эрхлэлт, ирсэн ажлын байрны захиалгын талаар мэдээлэл өглөө. Мөн алба хаах хугацаандаа амжилт бүтээл гаргасан нэр бүхий залуусыг аймгийн Засаг даргын жуух бичгээр шагнаж урамшууллаа.

Энэхүү үйл ажиллагааг Зүүн бүсийн хөгжлийн тулгуур төв Чойбалсан хотынхоо Тусгаар тогтнолын талбайд ийнхүү анх удаа зохион байгуулж буй бөгөөд энэ сарын 18-ны өдөр цэргийн албанд татагдаж буй залуусаа үдэж өгөх ёслолын үйл ажиллагаа болно.
Цаашид тус ёслолын үйл ажиллагаануудыг тогтмол зохион байгуулах тухай аймгийн Батлан хамгаалах газрын дарга бөгөөд аймгийн Засаг дарга хэллээ.

Монгол эх орны минь хил тайван амгалан, ариун гал голомт үүрд бат оршиж, Монгол цэргийн хийморь бадартугай. IMG_0615IMG_0666 IMG_0662 IMG_0660 IMG_0657 IMG_0613 IMG_0612 IMG_0611 IMG_0609 IMG_0606 IMG_0604 IMG_0603

22359320_1490111881037014_1690624038_n

Хурд сааруулагчийн тэмдэглэгээг зориулалтын будгаар сэргээж байна

Манай аймгийн төвд 19 байршилд автозамын хурд сааруулагч байдаг.

“Чойбалсан хөгжил” ОНӨААТҮГ аймгийн Орон нутгийн сангийн санхүүжилтээр термопластик будгийн машинтай болсоноор автозамын хурд сааруулагчийн тэмдэглэгээг зориулалтын будгаар сэргээх ажлыг хийж байна.

Термопластик будаг нь нунтаг төлвөөс өндөр градуст халж, шингэн төлөвт шилжин, маш түргэн хугацаанд хатдаг бөгөөд тогтоц нь гурван жил хүртэлх хэдий ч замын ачааллаас шалтгаалан элэгддэг аж.

Энэ талаар “Чойбалсан хөгжил” ОНӨААТҮГ-ын дарга Ц.Сүхбаатараас тодруулахад: “Термопластик будаг нь хуурай нунтаг бөгөөд зориулалтын төхөөрөмжид 200 гардуст халж, шингэн төлөвт шилждэг, тогтоц удаан, замын тэмдэглэгээний зориулалтын будаг. Дорнод аймагт замын тэмдэг, тэмдэглэгээ хийдэг компани байдаггүй учир заавал тендер зарлаж засвар, сэргээлтийн ажлыг хийх шаардлагатай болдог байсан. Орон нутгаас энэхүү төхөөрөмжийг шийдвэрлэж өгсөнөөр  одоо манай компани өөрсдөө хийх бүрэн боломжтой болж байна” гэв.

Хэдий тэмдэглээг зориулалтын төхөөрөмж, будгаар сэргээж байгаа ч хурд сааруулагчууд элэгдэж, барзайн, зарим газраа хагарч эмтэрсэн зэрэг нь будаг нимгэн зузаан түрхэгдэх, зарим газраа барзайх зэрэг шалтгаан болж, ажилд багагүй цаг зарцуулж байгаа ажээ.

 

бүтээлийн ундарга

“Бүтээлийн ундарга” шагналд нэр дэвшигчдийг бүртгэж байна

Аймгийн иргэдийн Төлөөлөгчдийн Хурлын Тэргүүлэгчдийн 2007 оны 62 дугаар тогтоолоор “БҮТЭЭЛИЙН УНДАРГА”, “ОЮУНЫ УНДАРГА” Дорнод аймгийн тэргүүн шагналыг бий болгосон билээ.

Дорнод аймгийн суут хүмүүний нэг XIX зууны Монгол төрийн нэрт зүтгэлтэн, их бүтээлч, эдийн засгийн шинэтгэгч Б.Тогтохтөр /То Ван/-ийн дүр бүхий “Бүтээлийн ундарга” хүндэт тэмдгийг хөдөлмөр бүтээлийн, XX зууны Монголын манлай их эрдэмтэн Ц.Дамдинсүрэнгийн дүр бүхий “Оюуны ундарга” хүндэт тэмдэгийг оюуны бүтээл, туурвилын амжилт гаргасан хүмүүст олгодог.

Энэ онд Дорнод аймгийн тэргүүн шагнал “Бүтээлийн ундарга”-ийн эзнийг тодруулах бөгөөд аймгийн Засаг даргын захирамжаар шагналд нэр дэвшигчийг шалгаруулах ажлын хэсэг байгуулагдан ажиллаж байна.

Шалгаруулалт аймгийн иргэдийн Төлөөлөгчдийн Хурлын Тэргүүлэгчдийн 2010 оны 46 дугаар тогтоолын 1 дүгээр хавсралтаар батлагдсан Дорнод аймгийн тэргүүн шагнал олгох журмын дагуу явагдана.

“Бүтээлийн ундарга” шагналд нэр дэвшигчдэд тавигдах шаардлага:

Дорнод аймгийн бүтээн байгуулалтын салбарт хөрөнгө оруулалт хийж, орон нутгийн хөгжилд үнэтэй хувь нэмэр оруулсан, аймгийн хөгжлийн төлөө бүтээлч санал, санаачилга гаргаж, хэрэгжүүлэх үйл ажиллагааг манлайлан ажилласан “То Ван” судлал болон түүний амьдрал, үйл бүтээл, туурвилыг сурталчлан дэлгэрүүлэхэд идэвх зүтгэл гаргасан дотоод гадаадын иргэд, аж ахуйн нэгж, төрийн бус байгууллага, түүний гишүүд,
Ажлын байр нэмэгдүүлэх, ядуурлыг бууруулахад бодитой хувь нэмэр оруулж, орон нутгийн төсөвт татвар төлөлтөөр манлайлан үлгэр жишээ үзүүлсэн аж ахуйн нэгжийн удирдлага, бизнесменүүд

Шалгаруулалт:

Нэр дэвшигчдийн материалыг 2017 оны 10 дугаар сарын 23-ны өдрийг дуустал аймгийн Засаг даргын Тамгын газрын 7 тоот өрөө /Хөрөнгө оруулалт, хөгжлийн бодлого төлөвлөлтийн хэлтэс/-нд хүлээн авна.
Ажлын хэсэг шалгаруулалт хийж, 1-2 хүний нэрийг тодруулан аймгийн Засаг даргын Зөвлөлийн хуралдаанд өргөн мэдүүлнэ.
Уг саналыг аймгийн Засаг даргын Зөвлөлийн хуралдаанаар хэлэлцүүлэн шалгаруулж, 1 нэр дэвшигчийг аймгийн иргэдийн Төлөөлөгчдийн Хурлын Тэргүүлэгчдийн хуралдаанаар ёсчлон батлуулна.

Шагнал гардуулах:

Тэргүүн шагналыг Улс тунхагласны баярын өдөр гардуулна.

Дэлгэрэнгүй мэдээллийг аймгийн Засаг даргын Тамгын газрын Хөрөнгө оруулалт, хөгжлийн бодлого төлөвлөлтийн хэлтсийн 7058-3446 дугаарын утсаар лавлана уу.

http://www.dornod.gov.mn/content/24551