Category Archives: Mэдээлэл

IMG_0603

Гурван улсын “Хэрлэн экспо-2017″ үзэсгэлэн нээлтээ хийлээ

Дорнод аймагт Худалдаа Аж үйлдвэрийн танхим үүсэн байгуулагдсаны 10-н жилийн ойн баярын хүрээнд зохион байгуулагдаж байгаа Бүс нутгийн “Хэрлэн Экспо-2017” үзэсгэлэн худалдааны нээлтийн ажиллагаа 2017 оны 10 дугаар сарын 20-ны өдөр “Хэрлэн Номин бизнес төв”-д нээлтээ хийлээ. Нээлтийн үйл ажиллагаанд аймгийн Засаг дарга М.Бадамсүрэн, МҮХАҮТ-ын дарга Оюунчимэг, Дорнод ХАҮТ-ийн дарга Э.Адъяа болон хөрш зэргэлдээ БНХАУ-ын ӨМӨЗО-ны Хөлөнбуйр аймгийн төлөөлөгчид оролцож мэндчилгээ дэвшүүллээ. Үзэсгэлэн яармагт оролцогчдийн тоо жилээс жилд өсөн нэмэгдэж, байгаа бөгөөд энэ удаагийн үзэсгэлэн худалдаанд БНХАУ-ын Хөлөнбуйр аймаг, Хянган, Шилийн гол болон Улаанбаатар хот, Хэнтий, Сүхбаатар аймаг мөн Дорнод аймгийн брэнд бүтээгдэхүүн үйлдвэрлэгч ААНБ, бизнес эрхлэгч нийт 60 гаруй байгууллага, аж ахуй нэгж  оролцож байгаа юм. Үзэсгэлэн худалдаа 2017 оны 10 дугаар сарын 20-22-ныг хүртэл гурав хоногийн хугацаанд зохион байгуулагдана.

IMG_0571   МҮХАҮТ-ын Дорнод аймаг дахь салбар танхим нь орон нутгийн болон улс орны эдийн засгийн хөгжилд тус дэмжлэг үзүүлэх, бизнесийн үйл ажиллагаа эрхлэх таатай нөхцөл бүрдүүлэх, бүс нутаг хоорондын бизнес эдийн засаг худалдааны хамтын ажиллагааг өргөжүүлэн, аж ахуйн нэгж байгууллагуудаас гадаад, дотоодын байгууллагуудтай худалдаа эдийн засаг, шинжлэх ухаан, техникийн хамтын ажиллагааг бүх талаар хөгжүүлэх, өөрийн орны бараа бүтээгдэхүүнийг экспортод гаргахад дэмжлэг үзүүлэх зорилтыг орон нутагт хэрэгжүүлсээр 10 жилийн хугацааг үджээ.

IMG_0561 IMG_0563 IMG_0566 IMG_0569 IMG_0587 IMG_0575 IMG_0573

22491588_1695322470479571_2559261287085028551_n

“Соёл урлагийн салбарын хөгжлийг дэмжих” хөтөлбөртэй боллоо

Аймгийн соёл урлагийн байгууллагуудыг чадавхжуулах, соёлын өвийг түгээн дэлгэрүүлэх, өвлөн уламжлуулах зорилго бүхий “АЙМГИЙН СОЁЛ УРЛАГИЙН САЛБАРЫН ХӨГЖЛИЙГ ДЭМЖИХ ХӨТӨЛБӨР” аймгийн ИТХ-ын ээлжит 5-р хуралдаанаар батлагдлаа. Энэхүү хөтөлбөрийн гол зорилго нь аймгийн соёл урлагийн мэргэжлийн байгууллагуудын хөгжлийг дэмжих, урлаг, соёлын бүтээгдэхүүн, үйлчилгээний нэр төрлийг нэмэгдүүлэхэд оршиж байгаа юм.

jamyan_huurch

Булган сумын Соёлын төвийг Г.Жамъянгийн нэрэмжит болгов

Аймгийн иргэдийн Төлөөлөгчдийн Хурлын ээлжит 5 дугаар хуралдаан өнөөдөр хуралдаж байна.

Хуралдаанаар Булган сумын Соёлын төвийг Ардын жүжигчин, Төрийн шагналт, Зууны манлай морин хуурч Г.Жамъянгийн нэрэмжит болгох тухай асуудлыг хэлэлцэж, баталлаа.

Монголын морин хуурын орчин цагийн сургалтыг үндэслэгч, хөгжмийн урлагийн нэрт төлөөлөгч, сурган хүмүүжүүлэгч, профессор, төрийн их хуурч Гомбодоржийн Жамъян нь 1919 онд Дорнод аймгийн Булган сумын Туг уул хэмээх газар мэндэлсэн Булган сумын уугуул, тус сумаас төрсөн суут хүмүүн билээ.

Их хуурчийн гэр бүлийнхэн тус сумын Соёлын төвийг нэрэмжит болгох тухай хүсэлт гаргасны дагуу сумын иргэдийн Төлөөлөгчдийн Хурлаас аймгийн иргэдийн Төлөөлөгчдийн хурал, аймгийн Засаг даргад хүсэлт ирүүлжээ.

Г.Жамъян хуурч 20 орчим дуу, 2 хөгжимт драмын жүжиг, 14 концертын бүжиг, 1 бүжгийн жүжгийн хөгжим, үндэсний болон европын төрөл бүрийн хөгжмийн зэмсэгт тохируулан бичсэн 50 гаруй зохиол, морин хуур хөгжмийн 2 сурах бичиг, 1 дуурь, 2 киноны хөгжим бичиж, дэлхийн 20 гаруй оронд өөрийн үндэсний урлагаа сурталчлан таниулсан шавхагдашгүй суу билиг, авьяаст хүмүүн юм.

Их хуурчийн охин Ж.Цэцгээ Монголын хамгийн нарийн сапрон хоолойтой дуучин бөгөөд түүний хүү нь “Камертон” хамтлагийн ахлагч, Төрийн соёрхолт дуучин  Д.Болд билээ.

IMG_0474

Монголын Үйлдвэрчний эвлэлийн 100 жилийн ой тохиов

Монгол Улсад Үйлдвэрчний эвлэлийн хөдөлгөөн үүсч хөгжсөний 100 жилийн ойг Дорнод аймгийн үйлдвэрчний эвлэлийн хороо 10 дугаар сарын 19-ны өдөр тэмдэглэн өнгөрүүллээ. 1917 онд одоогийн Сэлэнгэ аймгийн Ерөөгийн алтны уурхайд ажиллаж байсан Орос, Монгол ажилчид хөдөлмөрлөх эрхээ хамгаалахаар тэмцсэнээр Монгол Улсад ҮЭ-ийн хөдөлгөөн үүсэх суурийг тавьсан түүхтэй. Өдгөө 100 жилийнхээ босгыг давж буй МҮЭ-ийн байгууллага 450 мянга орчим гишүүн, дэмжигчидтэйгээр үйл ажиллагаагаа явуулж байна.
Му-ын Засгийн газар, АОЭНХ-той МҮЭ-ийн холбоо нь хоёр жил тутам хөдөлмөр нийгмийн зөвшлийн гурван талт улсын хэлэлцээр байгуулдаг бөгөөд гэрээний биелэлтийг Засгийн газраас удаа дараа шахаж шаардаж хөдөлмөрчдийн дуу хоолойг төр засагт хүргэсээр ирсэн билээ. Аймгийн ҮЭ-ийн хороо 100 жилийн ойн баярын хурлын үйл ажиллагаагаа хөгжимт драмын театрт зохион байгууллаа. Баярын хурлын үйл ажиллагаанд аймгийн ИТХ-ын дарга Л.Хишигтогтох, аймгийн Засаг даргын орлогч Ш.Ёл, Хэрлэн сумын Засаг даргын орлогч Д.Пүрэв-Очир болон албаны төлөөлөгчид оролцож мэндчилгээ дэвшүүлсэн бөгөөд, энэ үеэр “Үйлдвэрчний эвлэл 100 жил” үзэсгэлэнг дэлгэн тавьсан бөгөөд МҮЭ-ийн холбооны нэрэмжит шагналаар нэр бүхий хүмүүсийг шагнаж урамшуулж, баярын хурлын үйл ажиллагаа хүндэтгэлийн тоглолтоор үргэлжилсэн юм.

IMG_0467 IMG_0471 IMG_0490 IMG_0493 IMG_0507 IMG_0503 IMG_0515

Picture1

“Ахуйн үйлчилгээ-2017” сарын аян үргэлжилж байна

Монгол  улсын Засгийн газрын тогтоолоор батлагдсан  “Ахуйн үйлчилгээний салбарыг хөгжүүлэх хөтөлбөр”-ийг хэрэгжүүлэх, ахуйн үйлчилгээний салбарын тулгамдаж буй асуудлыг шийдвэрлэх, ажиллагсдын мэргэжил, ур чадварыг дээшлүүлэх, хамтын ажиллагааг сайжруулж, үйлчилгээний чанар, өрсөлдөх чадварыг нэмэгдүүлэх зорилготой “Ахуйн үйлчилгээ-2017” сарын аян 2017 оны  10 дугаар сарын 10-аас эхлэн нэг сарын хугацаанд зохион байгуулагдаж байна. Зохион байгуулагчаар аймгийн ЗДТГ, Хөдөлмөр,  халамжийн үйлчилгээний  газар, Стандартчилал хэмжил зүйн хэлтэс, Политехник коллеж, МСҮТ, Ахуйн үйлчилгээний мэргэжлийн холбоод хамтран ажиллаж байгаа юм. Тус аяны хүрээнд аймгийн хэмжээнд ахуйн үйлчилгээний чиглэлээр үйл ажиллагаа явуулж буй аж ахуйн нэгж, иргэд, тэдгээрийн төлөөлөл болсон мэргэжлийн холбоод хамрагдаж байна. Аяны хүрээнд олон ажлыг зохион байгуулах бөгөөд ахуйн үйлчилгээ эрхлэгчдэд  үйлчилгээний орчин үеийн чиг хандлага,  хөдөлмөрийн аюулгүй байдал, эрүүл ахуй, үйлчилгээний соёл, маркетинг,  бизнесээ хөгжүүлэх сургалт, оёдолчны мэргэжил эзэмшүүлэх сургалтад 15 иргэнийг хамруулж ажлын байранд зуучлах, спортын уралдаан тэмцээн уралдаан, ахуйн үйлчилгээний мэргэжлийн холбоод, байгууллагуудаас  ЯВУУЛЫН ҮЙЛЧИЛГЭЭ-ний баг Баян-Уул, Цагаан-Овоо, Сэргэлэн, Чойбалсан   сумдад ажиллах, ахуйн үйлчилгээний цэг салбаруудад стандарт, норм норматив, дотоод хяналтыг сайжруулах талаар зөвлөн туслах үйлчилгээ үзүүлэх, 2017 оны 10 дугаар сарын 29-ний өдөр “Ахуйн үйлчилгээ-2017” SALE 29%  хямдрал зэрэг ажлууд хийгдэх юм.

22552809_1834838056827620_2733347238724188778_n

Иргэн та С вируст хепатитийн эмчилгээнд үнэ төлбөргүй хамрагдаарай

Монгол Улсын Засгийн газраас орон даяар хэрэгжүүлж буй “Элэг бүтэн Монгол” хөтөлбөрийн хүрээнд энэ онд 40-65 насны бүх иргэдийг өрх, сумын эрүүл мэндийн төвд элэгний В, С вирүс илрүүлэх шинжилгээнд хамруулан, С вирүсийн халдвар илэрсэн тохиолдолд вирусийн ачаалал тоолох шинжилгээнд үнэ төлбөргүй хамруулж, эмчилгээ шаардлагатай иргэдийг хөнгөлөлттэй үнээр эмчилгээнд хамруулж байгаа билээ.

Санхүүжилтийн улмаас түр хугацаагаар зогсоод байсан ачаалал тоолох шинжилгээг 10 дугаар сарын 10–наас эхлэн БОЭТ-д дахин үнэ төлбөргүй хийж эхлээд байна.
Иймд С вирусийн халдвар илэрсэн 40-65 насны иргэн та БОЭТ-ийн лабораторид өөрийн биеэр ирж ачаалал тоолох шинжилгээгээ үнэ төлбөргүй хийлгээрэй.
Мөн эмчилгээ хийлгэх шаардлагатай тохиолдолд эрх бүхий эмчээр эмээ бичүүлэн эмчилгээгээ хийлгэх бөгөөд дараах 4 төрлийн эм манай аймагт худалдаалагдаж байна.

Үүнд:  Хепсинат-210000 /Төгс Фармакон эмийн сан 24-р байр/,
Ледвир-340000 /Дорнод эм хангамж, Гаалийн газрын баруун талд/,
Ледипас-350000 /Ачит тан эмийн, 20-р байр/,
Верипас-340000 /Мянган сарнай эмийн сан, 22-р байр/
Эрүүл мэндийн даатгалын сангаас элэгний С вирусийн эмийн үнийг 210000 төгрөгөөр хөнгөлж байгаа учир эрүүл мэндийн даатгалтай иргэд Хепсинат эмийг ҮНЭГҮЙ, бусад эмийг 130000-140000 төгрөгөөр худалдан авах боломж бүрдэж байгаа юм
Иймд 40-65 насны иргэн та илрүүлэг шинжилгээндээ идэвхтэй хамрагдаж, вирус илэрсэн тохиолдолд эмчилгээгээ яаралтай хийлгэнэ үү.
Илрүүлэг шинжилгээ, эмчилгээнд хамрагдахын тулд та ЭРҮҮЛ МЭНДИЙН ДААТГАЛ ТӨЛСӨН байх ёстойг анхаарна уу.

Эх сурвалж: http://www.dornod.moh.gov.mn

IMG_0094

Аймгийн Засаг даргад зөвлөн туслах “Ахмадын зөвлөх баг”-тай уулзав

Монгол Улсын хууль тогтоомж, төрийн бодлого шийдвэр, Дорнод аймгийн 2016-2025 оны хөгжлийн хэтийн зорилт, хөтөлбөр, төслийг хэрэгжүүлэх ажилд зөвлөн туслах “Ахмадын зөвлөх баг”-ийг өнгөрсөн сард байгуулсан. Зөвлөх багт төр захиргаа, эдийн засаг санхүү, нийгэм, соёл, спорт, эрүүл мэнд, боловсрол, бүтээн байгуулалт, инженерийн салбаруудын ахмадуудаас олон жил салбартаа үлгэр дууриал болсон, хийж бүтээсэн зүйлээрээ бусдад үлгэр дууриал болж,  төрийн хүндэтгэл хүлээсэн хүмүүс багтаж байгаа юм.

         Энэ удаад “Зөвлөх баг”-ийнханд Аймгийн эдийн засаг нийгмийг 2017 онд хөгжүүлэх үндсэн чиглэлийн биелэлт, Аймгийн эдийн засаг нийгмийг 2018 онд хөгжүүлэх үндсэн чиглэлийн төсөл болон бусад хөтөлбөр төслүүдийн талаар танилцуула хийж зөвлөгөө авлаа.

          “Ахмадын зөвлөх баг” нь 9 хүний бүрэлдэхүүнтэй бөгөөд багийн Нарийн бичгийн даргаар төр захиргааны ахмад ажилтан Б.Өлзийбаян, гишүүдэд МУ-ын Гавьяат эдийн засагч, аймгийн ИТХ-ын төлөөлөгч Л.Түвдэнням, МУ-ын Эрүүлийг хамгаалахын гавьяат ажилтан, Нийгмийн эрүүл мэндийн мастер, тэргүүлэх зэргийн эмч, “Нью-Эндорфин” ХХК-ийн захирал С.Вандансүрэн, МУ-ын Соёлын Гавьяат зүтгэлтэн, МҮОНР-ийн орон нутаг дахь сурвалжлагч Л.Хэрээ, Төр захиргааны ахмад ажилтан С.Чойжилсүрэн, “ДБЭХС” ТӨХК-ийн ахмад ажилтан П.Цэрмаа, Улаанаатар төмөр замын Баянтүмэн тасгийн ахмад ажилтан Ш.Моонон, Инженер, зохион бүтээгчдийн нэгдсэн холбоо” ТББ-ын тэргүүн Д.Сүхбаатар, Дорнод аймгийн ахмад багш нарын холбоо”-ны тэргүүн Л.Нарандаваа нар тус тус ажиллаж байна

22522356_1772361426130248_1144957639_o

“Хэрлэн экспо-2017” үзэсгэлэн худалдаа болно

Аялал жуулчлалын салбарын хөгжлийг эрчимжүүлэх ажлын хүрээнд Монгол улс, ОХУ, БНХАУ-ын аялал жуулчлалын бизнес эрхлэгчдийн хамтын ажиллагааг өргөжүүлэх, аялал жуулчлалын бүтээгдэхүүний борлуулалтыг нэмэгдүүлэх зорилгоор 8 дахь жилдээ зохион байгуулагдаж буй Хөрш зэргэлдээ гурван улсын аялал жуулчлалын өдөр арга хэмжээний “Хэрлэн экспо-2017” үзэсгэлэн худалдаа 2017 оны 10 дугаар сарын 20-22-ны өдрүүдэд Хэрлэн номин Бизнес Төвийн үзэсгэлэнгийн талбайд болно.

Энэ үеэр үзэсгэлэн худалдаанаас гадна “Эдийн засагт тулгуурласан хот төлөвлөлт ба Зүүн бүсийн хөгжлийн гарц-2017” уулзалт, форум, Монголын Архитекторуудын үзэсгэлэнгийн нээлт тус тус болно.

Үзэсгэлэн худалдааг Аймгийн Засаг даргын тамгын газар, Худалдаа аж үйлдвэрлэлийн танхим, Монголын Архитекторуудын зөвлөл хамтран зохион байгуулж байна.

IMG_0451

Нээлттэй утас 7058-2233-т аймгийн Эрүүл мэнд, нийгмийн даатгалын хэлтсийн дарга Ө.Амарсайхан ажиллаж байна.

“НЭЭЛТТЭЙ УТАС – 7058-2233” дугаарын утас, “Иргэд хүлээн авах төв”-д, аймгийн Засаг даргын дэргэдэх агентлаг, газар, хэлтсийн удирдах ажилтнууд 7 хоног бүрийн Пүрэв гарагт ажиллаж байна. 2017 оны 10 дугаар сарын 19-ний өдөр аймгийн Эрүүл мэнд, нийгмийн даатгалын хэлтсийн дарга Ө.Амарсайхан ажиллаж байна. Ирэх 7 хоногт буюу 2017 оны 10 дугаар сарын 26-ны өдөр аймгийн Газрын харилцаа, барилга, хот байгуулалтын газрын дарга Д.Дамдинбазар нээлттэй утсанд ажиллана. Та бүхэнд нээлттэй утсанд санал, хүсэлтээ 08-12 цаг 13-17 цагийн хооронд холбогдох боломжтой юм.